أيش هو الفقد الغامض
هو نوع من الحزن ما يقدر يكتمل، لأن الشيء اللي فقدته ما راح تمامًا… ولا رجع تمامًا، في المنطقة الرمادية الغير مفهومة.
زي لما شخص تحبه يكون حيّ بس غايب عنك عاطفيًا، أو لما تفقد حلم ما تقدر تعلن موته، أو لما تتغير حياتك فجأة بس ما تقدر تسمي اللي راح.
هو فقد ما له طقوس، ولا عزاء، ولا نهاية واضحة.
ليش نحس فيه؟
لأن النفس تحتاج معنى، تحتاج تعرف: "هل انتهى الشيء؟ هل أقدر أودّعه؟"
لكن الفقد الغامض يعلّقنا في منطقة رمادية: لا وداع، ولا رجوع.
نحس فيه لما نخسر شيء ما ينعترف فيه كخسارة؛ زي علاقة انتهت بدون تفسير، أو شخص تغيّر فجأة بدون إنذار مُسبق، أو وطن تغيّرت ملامحه.
نحس فيه لأننا بشر، نحتاج ختام عشان نبدأ شفاء… ولما ما يجي الختام، يظل الجرح مفتوح.
أيش علاماته؟
تحس إنك "عالق"، لا قادر تحزن بشكل واضح، ولا قادر تتجاوز.
تتكرر الأسئلة في بالك: "هل أشتي نرجع؟ هل المفروض أزعل؟ هل أنا مبالغ؟"
تعيش حالة من التردد، من الحنين، من الغضب اللي ما له مكان.
وتحس إنك وحيد في حزنك، لأن ما أحد شايف إن اللي فقدته يُعتبر "فقد".
أيش الرسالة اللي يشتي الفقد الغامض يوصلها لنا؟
في شيء داخلك يحتاج اعتراف… حتى لو العالم ما شافه خسارة." ، "مافي معايير للحزن تُستوفى عشان تعترف فيه.. اعترف "
هو دعوة إنك تعترف بحزنك، حتى لو ما كان له جنازة.
إنك تقول: "أنا فقدت شيء مهم، حتى لو ما في أحد سمّاه معي."
أيش اللي نحتاجه؟
نحتاج نسمّي الفقد، ونعترف بالخسارة حتى لو ما كانت واضحة.
نحتاج نخلق طقوس وداع خاصة فينا؛ سواء رسالة، صورة، أو حتى لحظة صمت.
نحتاج ناس يسمعونا بدون ما يطلبوا منّا نوضّح ليش أو نبرّر.
نحتاج نسمح للحزن يعيش، حتى لو ما كان "منطقي".
كيف نستفيد من الجزء الحلو فيه؟
الفقد الغامض يعلّمنا التعاطف مع الآخرين اللي فقدوا أشياء ما نقدر نشوفها.
يخلينا نكون ألطف مع أنفسنا، ومع الناس اللي "لسّا ما تجاوزوا".
يعطينا عمق، ويفتح باب لفهم مشاعر ما لها اسم، لكنها حقيقية.
كيف نتخلص من الجزء السيء فيه؟
ما نحاول نمحيه، بل نحتويه.
نبدأ نسمّي اللي فقدناه، حتى لو ما كان واضح.
نخلق وداع رمزي، نكتب، نرسم، نشارك.
نسمح للحزن ياخذ وقته، بدون استعجال، بدون مقارنة.
ونذكّر أنفسنا: "مش كل فقد له نهاية واضحة… بس كل حزن يستحق يُحتوى."
، ولو ما لقينا المساحة الامنة اللي تحتوينا في هذه اللحظات فساعتها مافي أكفى وأجدر
من مختص نفسي لطيف يحتوينا ويساعدنا نتخطى💙.