أيش هو الضغط النفسي؟
هو حالة توتر داخلي، يخلّي الجسم والعقل يدخلوا وضع تأهّب، كأن في شي يهدّدنا، حتى لو ما في خطر حقيقي.
هو مش ضعف، هو استجابة طبيعية من الجسم لما يحس إن الوضع أكبر من طاقته.
ليش نحس فيه؟
نحس فيه لما المسؤوليات تتراكم، والمشاعر تتداخل، والأفكار تشتغل بدون توقف.
لما نحاول نكون "قدّها" طول الوقت، بدون ما نسمح لأنفسنا نرتاح.
الضغط يطلع لما الجسم يدخل وضع -قاتل أو اهرب-، "fight or flight" بس يعلق فيه، وما يعرف كيف يهدأ.
أيش علاماته؟
ما يجي فجأة… يبدأ بهدوء، تحس إنك مش مرتاح، بس مش قادر توضّح ليش.
تحس جسمك مشدود، كأنك شايل شي ثقيل ما يبان. النوم يتقّطع، والمخ ما يوقف تفكير.
كل شي بسيط يصير ثقيل، وكل صوت عالي يزعجك أكثر من اللازم.
تبدأ تنسي، تتشتّت، أو تحس إنك مش قادر تركّز حتى في الكلام.
أحيانًا تبكي بدون سبب واضح، أو تنعزل لأنك ما عندك طاقة تشرح تعبك.
تحس إنك "مضغوط"، بس ما تعرف من فين تبدأ تفكّ هذا الضغط.
أيش الرسالة اللي يشتي يوصلها لنا؟
"أنا محتاج تهدأ، تتريث وتترتب، وتخفّف الحمل."
هو نداء داخلي يقول: "في شي زايد، والنفس ما عاد قادرة تتحمّل."
الضغط مش عدو، هو منبّه… يقول لنا إننا محتاجين نوقف، نراجع، ونتنفس، رسالة تقول ان الحمل صار أكثر من القدرة التحمُليّة
أيش اللي نحتاجه؟
نحتاج نلاحظ إشارات الجسم قبل ما يتعبنا.
نحتاج نرتّب أولوياتنا، ونفكك فكرة إننا لازم نكون دايمًا منتجين.
نحتاج نمارس تنظيم النفس: تنفّس عميق، حركة خفيفة، كتابة، أو حتى بكاء بسيط.
ونحتاج نحيط أنفسنا بناس يفهمونا، مش يضغطونا.
كيف نستفيد من الجزء الحلو فيه؟
الضغط النفسي يخلينا ننتبه، نتحرّك، وننجز.
هو طاقة مؤقتة تساعدنا نركّز، ننجز، أو نحمي أنفسنا وقت الخطر.
نستفيد منه لما نستخدمه كدافع، مش كعبء… ولما نسمح له يكون مؤقت، مش مزمن.
كيف نتخلص من الجزء السيء فيه؟
نبدأ نلاحظ متى الضغط يتحوّل من دافع إلى إنهاك.
نمارس الرحمة الذاتية -يعني نرأف بأنفسنا-، ونسمح لأنفسنا نرتاح بدون شعور بالذنب.
نقلّل التراكم، ونفكك المهام الكبيرة إلى خطوات صغيرة.
نرجع للجسم، نهدّيه، ونسمح له يتنفّس، عشان العقل يهدأ، وإذا ما عرفنا نهدأ، او إذا ما عرفنا نغير افكارنا، أو إذا حسينا إن الموضوع أكبر من طاقتنا، ما في أكفى، وأجدر من مختص نفسي لطيف يساعدنا نرجع نوزن الأمور صح 💙.